Ашьаҟауаа рколоннақәа аныҳәатә ҟазшьа змоу реицныҟәара иалахәхоит 700-ҩык инареиҳаны ауаа -- Атәылахьчара аминистрра, Аҳәынҭқарратә хьчара амаҵзура, Аҩныҵҟатәи аусқәа рминистрра, Аҷыдатә ҭагылазаашьақәа рминистрра, Аҳәынҭқарратә ҳазалхратә еилакы, Урыстәылатәи Афедерациа Атәылахьчара Аминистрра абыжьбатәи еидҵоу арратә база, Аԥсны иҟоу Урыстәыла АШӘМ Аҳәаахьчаратә усбарҭа рмаҵзурауаа. Авиациеи арратә техникеи ахархәара рыҭахоит.

Беслан Бигәаа инаҵшьны иазгәеиҭеит Аиааира ду Амш азгәаҭара ишахәҭоу ала аҽазыҟаҵара иамоу аҵак ду, иагьазгәеиҭеит арратә парад афырхацәа рфырхаҵара ҳаҭыр ду ақәҵара иасимволны ишыҟоу.

Сынтәа аныҳәатә ҟазшьа змоу ар реицныҟәара Лаҵарамза 9 рзы Ахақәиҭра ашҭаҿы имҩаԥгахоит.