Владимир Путин Бадра Гәынба иҭабуп ҳәа иеиҳәеит Аиааира Амш иазку аныҳәатә усмҩаԥгатәқәа рылахәразы. Иазгәеиҭеит Аԥсны жәлар рзы афырхацәа ҳаҭырла ргәалашәара џьашьатәӡам ҳәа, избан акәзар 55 нызқьҩык инареиҳаны ареспублика ауааԥсыра аибашьра иалахәын, 23-ҩык Асовет Еидгыла Афырхаҵа ҳәа ахьӡ рыхҵоуп, 17 нызқьҩык аԥсуа милаҭ рхаҭарнакцәа афронтқәа рҿы иҭахеит.

Урыстәыла Ахада иазгәеиҭеит ҩ-ганктәи аизыҟазаашьақәа еиҵахарада рыҿиареи атәылақәа рыбжьара атауареикәыршара аизҳареи.

«Иазгәасҭар сҭахуп ҳҳәынҭқаррабжьаратә еизыҟазаашьақәа қәҿиарала аҿиара ишаҿу. Шықәсык инахыҳәҳәаны иҵуеит ареспублика шәахагылоижьҭеи. Ари аамҭа иалагӡангьы хра злоу аиҭакрақәа мҩаԥысуеит. Убас, иҳаҩсыз ашықәс азы атауареикәыршара 16 процент рыла иазҳаит. Ари рбага бзиоуп», - иҳәеит Владимир Путин.

Гәынба Бадра Владимир Путин аныҳәа идиныҳәалеит, иҭабуп ҳәа иеиҳәеит аҭоурыхтә гәалашәара аиқәырхаразы илшарақәа рзы. 

Аԥсны ахада иазгәеиҭеит аусхкқәа зегьы рҿы аусеицура активла аизҳара, иҭабуп иеиҳәеит ареспубликазы акрызҵазкуа аӡбамҭақәа рзы.

▫Шәара ииашаны иазгәашәҭеит ҳаизыҟазаашьақәа ццакны аҿиара ишаҿу, атауареикәыршара аизҳара иаҿуп, шамахамзар аԥсҭазааратә усхкқәа зегьы аизҳара рныԥшуеит», — иҳәеит Гәынба Бадра.

Ҷыдала, иара иҳәеит Жәларбжьаратәи аҳаирбаӷәаза «Аҟәа» аартраҿы иҟаҵоу адгылара иабзоураны 2025 шықәсазтәи аихшьалақәа рыла иааиԥмырҟьаӡакәа ареисқәа рҳәаа иҭагӡаны 120 нызқьҩык инареиҳаны ауааԥсыра аҳаиртә транспортла риагара шалыршахаз.

«Иахьа Аҟәа ишиашоу ицо ареисқәа рыла ирыдҳәалоуп Москва, Санкт-Петербург, Ханты-Мансииск, Уфа, Нижни Новгород. Арҭ амшқәа рзы ҳазыԥшуп аҳаиреимадара ҿыц аартра — Ставропольтәи атәылаҿацә, Минводы. Аԥыррақәа ргеографиа аҽарҭбаауеит. Ҳәарада, ари ҳаизыҟазаашьақәа, аекономика аҿиара аҳәаақәа ирҭагӡаны иццакны имҩаԥысуа ахырхарҭақәа иреиуоуп», - ҳәа инаҵшьны иазгәеиҭеит Гәынба Бадра.

Иара убас атәыла Ахада иҭабуп ҳәа реиҳәеит урыстәылатәи амедицинатә усзуҩцәа рыцхыраареи иаарту алабораториақәеи рзы.

"Иҭабуп ҳәа шәасҳәоит амедицинатә усзуҩцәа инарымаданы ишәыдышәкылаз аӡбаразы. Ҵыԥх иаҳа ацхыраара анаҳҭахыз аамҭазы урыстәылатәи амедицинатә усзуҩцәа ҳтәылаҿы иҟан, ҳаспециалистцәа ирыцхраауан. Иара убас аӡбара ишәыдышәкылаз ала асанитар-, ҳара ҳзы даара акрызҵазкуа аепидемиологиатә лабораториақәа аартуп», — иҳәеит Гәынба Бадра.

Хазы иҭабуп ахҳәаан 14 шықәса зхымҵыц ахәыҷқәа рзы аҳәаа ахысразы ирмариоу аԥҟара аиқәырхаразы.

«Иара убас иҭабуп ҳәа шәасҳәар сҭахуп 14 шықәса зхымҵыц ахәыҷқәа рзы аҳәаақәа рахыгаразы анорма ҿыцқәа инарымаданы ишәыдышәкылаз аӡбаразы. Арҭ аԥкрақәа Аԥсны макьана иаҵанакӡом. Ари Ареспубликахь атуристтә раара аизырҳара алнаршоит. Иҭабуп идуӡӡаны ҳәа шәасҳәоит хаҭала хшыҩзышьҭра иҳашәҭо, ҳтәылақәа рыбжьара аусеицура апроцессқәа шәалахәу азы», - ҳәа азгәеиҭеит Гәынба Бадра.

Аиԥылара ахыркәшамҭаз Бадра Гәынба Владимир Путин Аԥсны атәылауаа зегьы рыхьӡала Аиааира амш идиныҳәалеит.