Аиԥылара иалахәын акультура аминистр Даур Ақаҩбеи Фазиль Искандер ихьӡ зху Аҳәынҭқарратә аурыс драматә театр адиректор хада Иракли Хынҭәбеи.
Урыстәыла Аҳәынҭқарратә академиатә Театр маҷ аҭоурых аҿы ииубилеитәу, 270-тәи асезон азы раԥхьаӡа акәны Аԥсныҟа иааит. Фазиль Искандер ихьӡ зху Аҳәынҭқарратә аурыс драматә театр асценаҿы рашәарамза 11-14 рзы атеатр артистцәа ахәаԥшҩцәа иддырбараны иҟоуп Н. В. Гоголь испектакльқәа «Аԥҳәысаагара», «Ахәмарҩцәа». Арбарақәа мҩаԥгахоит урыстәылазегьтәи апрограмма «Агастроль Дуқәа» аҳәаақәа ирҭагӡаны Урыстәылатәи Афедерациа Акультура аминистрра ацхыраарала.
Асасцәа бзиала шәаабеит ҳәа раҳәо, аҳәынҭқарра Ахада иҳәеит Атеатр Маҷ аҭоурых аҿы Аԥсны имҩаԥысуа раԥхьатәи агастрольқәа ареспублика акультуратә ԥсҭазаараҿы акрызҵазкуа хҭысны ишыҟалаз. Гәынба Бадра иазгәеиҭеит урҭ ахәаԥшцәа ргәаҿы аҭыԥ ҷыда шааныркыло, аԥсны-урыстәылатәи акультуратә еимадарақәа рҭоурых аҿы акрызҵазкуа даҟьак аҳасабала ишазгәаҭахо.
Атәыла ахада инаҵшьны иазгәеиҭеит Аԥсны гәык-ԥсыкала ишеигәырӷьо Урыстәыла жәлар рартистцәа Ирина Муравиова, Лиудмила Полиакова, Валери Афанасиев, Александр Ермаков, Владимир Дубровски, Глеб Подгородински, артист Игор Петренко уҳәа аколлектив алахәцәа рбара. Гәынба Бадра иазгәеиҭеит арҭ аҟазацәа дуқәа рҟазара иабзоураны ишрызҳаз акымкәа абиԥарақәа.
Аҳәынҭқарра Ахада ҷыдала иҭабуп ҳәа иеиҳәеит Атеатр маҷ арежиссиор Хада Алексеи Владимир-иԥа Дубровски, инаҵшьны иазгәеиҭеит ареспубликаҿы ахә ҳаракны ишыршьо Аԥсни Урыстәылеи рыбжьара акультуратәи агуманитартәи еимадарақәа рырҿиараҿы илагала.
Арежиссиор ирҵаҩратә усура иабзоураны аԥснытәи артистцәа ҿарацәа Шьепкин ихьӡ зху еицырдыруа аҵараиурҭаҿы аҵара ахысразы алшара роуит, урҭ иахьа Фазиль Искандер ихьӡ зху Аҳәынҭқарратә аурыс драматә театр амаҵ руеит, амилаҭтә театртә ҟазара аҿиараҿы рлагалагьы ыҟоуп. ́́
Аиҿцәажәараан атәыла Ахада инаҵшьны иазгәеиҭеит Аԥсни Урыстәылеи аидгыларатәи аиашьаратәи еизыҟазаашьақәа рыдагьы, иҵаулоу адоуҳатәи акультуратәи еимадара шрыбжьоу. Гәынба Бадра иазгәеиҭеит акультуреи, атеатри, алитературеи, аҟазареи шракәу ауаа рыбжьара аилибакаара арӷәӷәара, аҭоурыхтә гәалашәара аиқәырхара, абиԥара ҿыцқәа атрадициақәеи иҳараку ауаҩытәҩсатә ҟазшьатә цәаҩеи ҳаҭыр рықәҵаны рааӡара иацхраауа.
Аҳәынҭқарра ахада иҳәеит Атеатр маҷ агастрольқәа Аԥсны ахәаԥшцәа рзы ныҳәаҵас ишрыдыркыло, акультура аусхк аҟны аусеицура ԥхьаҟатәи аҿиара ишацхраауа.
Атәыла ахада иара убасгьы иҭабуп ҳәа иеиҳәеит Русдрам адиректор хада Иракли Хынҭәба аԥсуа культура аларҵәареи Урыстәыла атеатрқәа рымадара активла иахьымҩаԥысуазы.
Аиԥылара ахыркәшамҭаз Гәынба Бадра артистцәа иҭабуп ҳәа реиҳәаны, ирзеиӷьеишьеит арҿиаратә қәҿиарақәа, агәацԥыҳәара, аԥсуа уаажәлар рганахь ала гәыблыла адкылара.