Азакәанапроект ала ирыдгалоуп иарбоу анорма амчра аиуразы иеихшоу аҿҳәарақәа рышьақәыргылара. Аԥсуа милаҭ иатәу Аԥсны атәылауаа рзы аҳәынҭқарратә аԥсуа бызшәеи аурыс бызшәеи рдырразы аҭахра аусура иалагоит 2027 шықәса ажьырныҳәамза 1 инаркны, егьырҭ амилаҭқәа ирыҵаркуа Аԥсны атәылауаа рзы — 2032 шықәса ажьырныҳәамза 1 инаркны.

Азакәанапроект азы аилыркаагатә нҵамҭаҿы ишазгәаҭоу ала, Аԥсны Аҳәынҭқарра ԥсахрада шьаҭас иҟанаҵоит аҳәынҭқарратә бызшәа атәыла амилаҭтә хаҿреи асуверенитети акырӡа зҵазкуа ҵаҵӷәыс иахьрымоу.
 
Аԥсуа бызшәа адырра хымԥадатәиуп аҳәынҭқарра иреиҳаӡоу азакәанԥҵаратә усбарҭаҿы ажәлар хаҭарнакра рзура азин иашьҭоу рзы. Убри аангьы адокумент аҿы инаҵшьны иазгәаҭоуп аҳәынҭқарра аусура шымҩаԥнагогьы, ҳазҭагылоу аамҭазы аҳәынҭқарратә бызшәа аҵареи аиқәырхареи рзы иахәҭоу аҭагылазаашьақәа инагӡаны раԥҵара шзалмыршахаз.

Иара убас, Аԥсны Аҳәынҭқарра атәылауаа зегьы рзы аамҭак ала абызшәатә ценз алагалара асоциалтә еибарххарақәа ахылҿиаар алшоит.

Убри инамаданы азакәанапроект ирыднагалоит иарбоу аҭахра аамҭа-аамҭала алагалара. Ари аҩыза азнеишьа иалнаршоит аҳәынҭқарратә бызшәатә политика инеиԥынкыланы анагӡара, ауаажәларратә ҳәоуеиқәшәара аиқәырхара, убри аангьы Аԥсны Аҳәынҭқарра ихадоу аинститутқәа ируаку аԥсуа бызшәа иааннакыло аҭыԥ ҷыда ашьақәырӷәӷәара.

Аилыркаагатә нҵамҭаҿы ҷыдала иаҵшьны иҳәоуп: 

«Аҳәынҭқарратә бызшәа – ҳара ҳмилаҭтә хаҿреи ҳсуверенитети шьаҭас ирымоуп, уи адырра ҳтәыла азакәанԥҵаратә усбарҭаҟны ажәлар хаҭарнакра азызуа рзы ихымԥадатәу ҭахраны иҟоуп».