Аныҳәатә церемониаҟны аҳәынҭқарра Ахада ажәахә ҟаиҵеит. Ахада иқәгылараҟны Виачеслав Гладков Аҷыдалкаатәи Азинмчнаӡеи змоу Ацҳаражәҳәаҩ имаҵура иахагылара идиныҳәалеит, инаҵшьны иазгәеиҭеит ари амаҵураҭыԥ аҟны аԥышәа змоу аҳәынҭқарратә усзуҩ, апрофессионалтә дипломат иаҭара ҳтәылақәа рыбжьара аидгыларатә еизыҟазаашьақәа аринахысгьы рырӷәӷәара ишацхраауа.
«Ҳаҭыр зқәу Виачеслав Владимир-иԥа!
Ишәыдысныҳәалоит Аԥсны Аҳәынҭқарраҟны Иҟоу Урыстәылатәи Афедерациа Аҷыдалкаатә Зинмчы змоу Ацҳаражәҳәаҩ имаҵура шәахьахагылаз.
Ҳара гәык-ԥсыкала ҳаигәырӷьоит Аԥсны иҟоу Урыстәылатәи Афедерациа адипломатиатә хаҭарнакра аԥышәа змоу аҳәынҭқарратә усзуҩы дахьахагылаз. Агәра ганы сыҟоуп шәдырреи, шәԥышәа беиеи, ҳаамҭазтәи жәларбжьаратәи апроцессқәа инарҵауланы реилкаареи ҳҳәынҭқаррақәа рыбжьара аидгыларатә еизыҟазаашьақәа аринахысгьы рырӷәӷәара ишацхраауа.
Аԥсни Урыстәылеи ирыбжьоуп еицакра змам аиҩызареи, аидгылареи, агәреибагареи. Ҳаизыҟазаашьақәа шьаҭас ирымоуп азеиԥш ҭоурых, аҳаҭыреиқәҵара, аидгылара, ҳажәларқәа ршәарҭадареи, иҭышәынтәалоу рыҿиареи, реизҳазыӷьареи ралыршаразы наҟ-ааҟ иҳамоу агәазыҳәара», — иҳәеит Бадра Гәынба.
Урыстәылатәи Афедерациа Аԥсны Аҳәынҭқарра ганрацәала адгылара анаҭоит аҳәынҭқарратә суверенитет арӷәӷәареи, ашәарҭадара алыршареи, асоциал-економикатә ҿиареи рҿы. Ҳара ахә ҳаракны иаҳшьоит атәыла иҭышәынтәаланы аҿиареи ҳтәылауаа рыбзазара аизырҳареи иацхраауа адгылара.
Аҭагылазаашьа схы иархәаны гәык-ԥсыкала иҭабуп ҳәа иасҳәар сҭахын Урыстәылатәи Афедерациа Ахада Владимир Владимир-иԥа Путин Аԥсны Аҳәынҭқарра Аԥсны еиԥҟьарада иаиҭо адгылареи, аԥсны-урыстәылатәи аидгыларатә еизыҟазаашьақәа рырӷәӷәараҿы хаҭалатәи илагалеи рзы.
Агәра ганы сыҟоуп Шәара шәусура аамҭа иҭагӡаны ҩ-ганктәи аусеицура аринахыстәи ихадоу ахырхарҭақәа зегьы рыла инацҵаны аҿиара шаиуа.
Аԥсны ажәытә ҭоурыхи, ибеиоу акультуратә ҭынхеи, шәышықәсала иаауа атрадициақәеи змоу тәылоуп. Аԥсуа ҳәынҭқарра аҭоурых 1200 шықәса иреиҳауп, уи хәы ҳара змаӡам аҭынха ҳаиҷаҳаны еиқәырханы иааҳгоит. Агәра ганы сыҟоуп Аԥсни уи аԥсабара ссири бзиа ишыжәбо, иара убас асасдкылара злоу уи ажәлари Шәареи аилибакаареи аҳаҭыреиқәҵареи шшәыбжьало.
Ҳаҭыр зқәу Виачеслав Владимир-иԥа!
Шәара иахьа ҳнапы иашәыркыз агәраргагатә шәҟәқәа Аԥсны Аҳәынҭқарраҟны шәдипломатиатә усура акрызҵазкуа етапк аҳасабала ишхацыркхаз атәы аҳәоит. Ҳтәыла анапхгара ахаҿала Урыстәылеи Аԥсни ажәларқәа реизҳазыӷьара иазкны шәнапы злашәкуа аусқәа зегьы рыҟны конструктивла, иаартны аусеицуразы есқьынгьы шәзықәгәыӷша апартниор дышшәыдгылоу жәдыруазарц ҳҭахуп.
Ишәзеиӷьасшьоит агәабзиара, аманшәалара, аҭакзыԥхықәу адипломатиатә миссиаҿы ақәҿиарақәа, Аԥсны Аҳәынҭқарреи Урыстәылатәи Афедерациеи рыбжьара аиҩызареи, аидгылареи, аусеицуреи рырӷәӷәара аус аҿы аихьӡара ҿыцқәа.
Бзиала шәаабеит ҳәа шәаҳҳәоит Аԥсны Аҳәынҭқаррахь!»
Урыстәыла Ацҳаражәҳәаҩ аҭак ҟаҵо, иқәгылараҿы ишьақәирӷәӷәеит ихьыԥшым, ҳаамҭазтәи, адемократиатә ҳәынҭқаррак аҳасабала Аԥсны Аҳәынҭқарра ашәарҭадара аиқәырхареи иҭышәынтәаланы аҿиареи рзы Урыстәылатәи Афедерациа имҩаԥнаго аполитикатә хырхарҭа ԥсахрада ишымҩаԥысло атәы.
«Қәҿиарала имҩаԥысуа апроектқәа, хымԥада, ирныԥшуеит Урыстәылеи Аԥсни рыжәларқәа инарҵауланы реидгылара, рабдуцәа ргәалашәареи рдоуҳа-уаҩышәаратә ҵас бзиақәеи ҳаҭырқәҵарала ишазыҟоу, аԥхьаҟа игыло абиԥарақәа рԥеиԥш азы ирыду аҭакԥхықәра ишазхәыцуа атәы», — иҳәеит Виачеслав Гладков.