IV Пицундатәи афестиваль аҳәынҭқарра Ахада Гәынба Бадра иҟаиҵаз адгыларала еиҿкаауп. Афестиваль асахьаркыратә напхгаҩыс дыҟоуп Кәыџба Барас.
Апрограммаҿы ицәыргоуп Аԥсны аҳәынҭқарратә хортә капеллеи Александр Соловиов напхгара ззиуа Москватәи аконсерваториа Акамертә хори рықәгыларақәа. Аԥсны аҳәынҭқарратә хортә капелла асахьаркыратә напхгаҩыс дамоуп Аԥсны Жәлар рартист Ҷанба Нодар. Аконцерт иара убас далахәуп Урыстәыла Жәлар рартист, авиолончелист Александр Книазев. Ахәылԥаз адирижиорцәас иҟоуп Кәыџба Бараси Александр Соловиови.
IV Пицундатәи афестиваль мҩаԥысуеит нанҳәамза 1 аҟынӡа. Уи аҳәаақәа ирҭагӡаны имҩаԥгахоит аконцерттә программақәа 11 — Аԥсни, Урыстәылеи, ааигәатәи аҳәаанырцә атәылақәеи рҟынтә амузыкантцәа злахәу асимфониатә, акамертә, ахортә хәылԥазқәа, иара убас имҩаԥысуеит Пицундатәи афестиваль асимфониатә оркестр адебиут.