Аԥсны Жәлар Рџьынџьтәылатә еибашьра анцоз еиҳа иуадаҩыз аамҭазы, Игор Ахба Москва иҟаз Аԥсны ахаҭарнакра хадара аиҭон. Иара иусура инанагӡоз аҵакы дуун, аинформациатә усзура ахырхарҭала, ахаҭарнакра ахадаратә ҭыԥ ааннакылоит, Аԥсны акәша-мыкәша иҟаз аинформациатә блокада аԥыхра иацхраауан, еиҿнакаауан агәыманитартә цхыраара, Урыстәылатәи ауаажәларратәи аполитикатәи хеилакқәеи, амассатә информациатә хархәагақәеи рыбжьара аимадара аҳәаақәа арҭбаауан, иара убас ҳџьынџьуаа адгылара рынаҭон.
2028 шықәса рзы, Аҧсны Жәларбжьаратәи азхаҵара анаиу, Азинмчы нагӡа змоу ахаҭарнакра ашьаҭала Урыстәылатәи Афедерациа аҟны иаԥҵан Аҧсны Аҳәынҭқарра Ацҳаражәҳәарҭа. Игор Ахба уи раԥхьатәи Цҳаражәҳәаҩыс дҟалеит.
Иара ипрофессионализм, иԥсадгьыл ахь имаз абзиабара, шықәсы рацәалатәи иусзура, аԥсуа дипломатиа аҭоурых аҟны, иара убас ҳажәлар ргәалашәараҟны наунагӡа хашҭра ақәымкәа иаанхоит.
Гәык-псык ала срыдышшылоит Игор Мураҭ-иԥа иуацәа-иҭынхацәа, иколлегацәа, иара дыздыруаз, уаҩык иаҳасаб ала пату иқәызҵоз зегьы.
Игәалашәара лашазааит Игор Мураҭ-иԥа Ахба».
Аԥсны Аҳәынҭқарра Ахада Бадра Гәынба Иусԥҟала, Игор Ахба иԥсыжра аиҿкааразы иаԥҵоуп Аҳәынҭқарратә комиссиа, уи напхгара аиҭоит Аԥыза-министр Џьансыхә Нанба.