Ахада иазгәеиҭеит Аԥсни Урыстәылеи ирыбжьоу астратегиатәи аусеицзуратәи еизыҟазаашьа, убри аан иҳәеит Урыстәылатәи Афедерациа Аԥсны аганахь ала иҟанаҵо адгылара, ашәарҭадара ахьчареи, аекономикатә ҭагылазаашьа аиӷьтәреи акыр ишацхраауа.
Бадра Гәынба иажәақәа рыла, ас еиԥш иҟоу аусура хырхарҭас иамоуп урыстәылатәи арегионқәа ишиашоу рыҽрымадара, уи иаанартуеит аҭагылазаашьа бзиақәа аекономикатә ҿиара ахырхарҭала, иара убас аинвестициақәа радыԥхьалара, азеиԥш проектқәа рынагӡара, аусеицзуратә еимадарақәа рымҽхак арҭбаара.
Ахада иазгәеиҭеит, мшаԥымзазы Аҟәа имҩаԥысыз жәларбжьаратәи аекономикатә форум аҟны Аԥсны Аҳәынҭқарра Аиҳабыреи Калужсктәи Аиҳабыреи рыбжьара аилибакааразы анапы зҵаҩыз Амеморандум аусеицура амҽхак арҭбааразы аҭагылазаашьа ҿыцқәа шаԥнаҵаз.
Бадра Гәынба иазгәеиҭеит, аҵыхәтәантәи ашықәсқәа рзы Калужсктәи аобласти ҳтәылеи ирыбжьоу аимадарақәа еиҳа-еиҳа аҿиара ишаҿу, агәбернатор арахь иаара акәзар, уи ус шакәу шышьақәнарӷәӷәо.
Аҳәынҭқарра Ахада иҳәеит, Калужсктәи аобласт иамоу адинамикатә ҿиара, ааглыхратә усура аизҳара, ақыҭанхамҩа аусхк аҟны иҟоу аихьӡарақәа, иара убас аинвестициатә потенциал аҿиара, атехнологиақәа, асоциалтә хырхарҭақәа рықәҿиарақәа умбарц шалымшо. Ахада иажәақәа рыла, Калужсктәи аԥышәа Аԥсны азҿлымҳара анаҭоит, иаҳҳәозар, аекономикатә ҿиара ахырхарҭала, аинвестициақәеи анаплакқәеи рганахь ала.
Ахада азҿлымҳара аиҭеит, аҳәынтқаррақәа рнапхгарақәа рыбжьара иҟоу аимадарақәа рнаҩс, аҿиара шамоу анаплакыҩцәа рыбжьара азеиԥш проектқәа реицынагӡара, атауареикәыршара аусура аизҳара.
Аиԥылараҟны иазааҭгылан асоциалтәи агумантиартә хырхарҭақәеи ирыдҳәалаз азҵаарақәа. Бадра Гәынба дазааҭгылеит аҵарадырра, аҿартә политикеи акультуреи рыҿиара аганахь ала Аԥсни Калужсктәи аобласти ишиашоу аимадара шрыбжьаҵатәу.
Калужсктәи аобласт Ахада иазгәеиҭеит, аилибакаааразы анапы зҵаҩыз Амеморандум уажәнатә алҵшәақәа шаанаго: атауареикәыршара 56% рыла ишеизҳахьоу.
Калужсктәи аобласт атәылахь иаанагоит афатә аалыҵқәа, ақьаадтә маҭәахәқәа, абзазаратә химиа иатәу атауарқәа, убри аан азҿлымҳара анаҭоит Аԥснытәи ақыҭанахамҩатә аалыҵ аимпорт.
Владислав Шапша иазгәеиҭеит, Калужсктәи аобласт Урыстәыла иҟоу инагоу ааглыхратә центрқәа ишыруаку. Арегион аҟны активла аҿиара амоуп аԥстәи аԥсаатәи раалыҵ, иара убас аџьармыкьа аҭахрақәа ирықәшәо егьырҭ ааглыхрақәа рыхкқәа зегьы.
Хаз игоу аинвестициатә ҿырԥштәқәа дырзааҭгыло, Агәбернатор иазгәеиҭеит, Аԥсны ацитрустә бахҷақәа реиҭашьақәыргыларазы апроект, Софиа Агәмааԥҳа аус здылуло, Калужсктәи аобласт шазыхио иахәҭоу аинфраструктурала аиқәыршәара.
Владислав Шапша иазгәеиҭеит, Урыстәылатәи-Аԥснытәи аҿар рфорум аҟны Калужсктәи ахаҭарнакцәа ралахәхара, насгьы Аԥснытәи анапылампылтә команда Калужсктәи аобласт ахь рнеира қәҿиарала ишымҩаԥысыз.
Агәбернатор ажәалагала ҟаиҵеит Аԥснытәи аспециалистцәа Афедералтә технопарк аҟны апрофесионалтә ҵарадырра иахысырц азы.